तस्वीरमा चालिसे बस दुर्घटना

काठमाडौं । बुधबार बिहान काठमाडौंबाट पर्वत हुँदै म्याग्दीको बेनीतर्फ जाँदै गरेको म्याग्दी कोरला यातायात प्रालिको बस धादिङको गजुरी गाउँपालिका २ चालिसे स्थित पृथ्वी लोकमार्गमा दुर्घटना हुँदा ८ जनाको मृत्यु भएको छ । प्रदेश ३–०१–००५ ख ९९५२ नम्बरको बस अनियन्त्रित भई त्रिशुली नदिमा सडकबाट अन्दाजी ४० मिटर तल खसेको जिल्ला प्रहरी कार्यालय धादिङले जनाएको छ । 

दुर्घटनामा २ महिला र ६ पुरुष गरी ८ जनाको मृत्यु भएको हो । प्रहरीका अनुसार मृतकमध्ये तीनको पहिचान भएको छ भने बाँकीको पहिचान हुन बाँकी छ । दुर्घटनास्थलबाट जिल्ला प्रहरी कार्यालय धादिङ,  इलाका प्रहरी कार्यालय गजुरी, जिल्ला ट्राफिक प्रहरी कार्यालय गजुरी र स्थानीयको सहयोगमा १७ जनाको जीवित उद्धार गरिएको छ  ।  

प्रहरीका अनुसार बसमा २५ जना सवार थिए । उद्धार गरिएकामध्ये १४ जनालाई थप उपचारको लागि काठमाडौंतर्फ ल्याइएको छ । एकजना भने उपचार पश्चात डिस्चार्ज भएका छन् । बाँकी १ जनाको मलेखुको टिचिंग अस्पतालमा उपचार भइरहेको छ । एकजना भने सकुशल छन् ।