बागलुङ कालिका मन्दिरमा तेत्तीस लाख भेटी सङ्कलन

गलकोट (बागलुङ) । गण्डकी प्रदेशको प्रसिद्ध शक्तिपीठ बागलुङ कालिका मन्दिरमा भक्तजनको वृद्धि भएसँगै भेटी सङ्कलनमा पनि वृद्धि भएको छ । मन्दिरमा बडा दसैँको अवधि रु ३३ लाख भेटी सङ्कलन भएको छ ।  गत वर्षको दसैँमाभन्दा यो वर्षरु १० लाख बढी सङ्कलन भएको छ ।  

दसैँको पहिलो दिन घटस्थापनादेखि विजया दशमीको दिनसम्म करिब ६ लाख भक्तजन दर्शनका लागि कालिका मन्दिरमा आएका र रु. ३३ लाख भेटी सङ्कलन भएको बागलुङ कालिका भगवती मन्दिर  गुठी व्यवस्थापन समितिका अध्यक्ष कुमार खड्काले बताए ।

कालिका मन्दिरमा मुस्ताङ भ्रमणका लागि हिडेका स्वदेशी तथा विदेशी पर्यटकहरु समेत आउन थालेपछि धार्मिक पर्यटकको सङ्ख्यामा उल्लेख्य वृद्धि भएको पाइएको हो ।  कात्तिक महिनामा मात्रै रु. ४९ लाख भेटी सङ्कलन भएकोमा दसैँमा मात्रै रु. ३३ लाख भेटी सङ्कलन भएको हो । गत वर्षको दसैँमा रु. २३ लाख भेटी सङ्कलन भएको खड्काले बताए ।