नेपालगञ्ज म्याराथनको नवौँ संस्करण हुँदै

राँझा (बाँके) । बाँकेमा विस्तृत शान्ति सम्झौताको सम्झनामा हुँदै आएको ‘नेपालगञ्ज म्याराथन’को नवौँ संस्करणको तयारी गरिएको छ । यही मङ्सिर ९ गते हुने उक्त म्याराथनमा १४ विधामा प्रतिस्पर्धा हुने नेपालगञ्ज म्याराथनका संस्थापक अध्यक्ष टिएस ठकुरीले जानकारी दिए ।

‘एशोसियशन अफ इन्टरनेशनल म्याराथन एण्ड डिस्टेन्स रेश (एम्स)बाट मान्यता प्राप्त म्याराथनलाई अझ भब्य बनाउन चार विधा थपेर १४ पुर्‍याइएको छ’, उनले भने, ‘स्कुल स्तरियअन्तर्गत कक्षा ६ देखि ८ तथा ९ देखि १२ कक्षासम्मका लागि जिल्ला बाह्य र जिल्लाका गरी अलग अलग प्रतिस्पर्धा राखिएको छ ।’

ठकुरीका अनुसार, पुरुषतर्फ म्याराथन (४२ दशमलव १९५ किमि), महिलातर्फ हाम म्याराथन (२१ किमि), १० किमी खुल्लामा पुरुष र महिला, पाँच किमी स्कुलस्तरीय छात्र एवं छात्रा, किड्स रन (८ देखि १२ वर्षसम्म) तथा पाँच किमीका कर्पोरेट रन, ट्राइसाइकल र वाकाथन समावेश गरिएको छ । स्कुलस्तरीय दौडमा बाँके र बाह्य जिल्लालाई छुट्याइएको उनले जानकारी दिए । बाँके जिल्लाको हकमा कक्षा ६ देखि ८ तथा ९ देखि १२ कक्षासम्मको अलगअलग पाँच किमी छुट्याइएको उनले बताए ।

आयोजक क्रियटिभ ह्याण्डसले यस वर्षको म्याराथनमा नगद पुरस्कार राशिमा वृद्धि गर्ने जनाएको छ । संस्थाका अध्यक्ष ठकुरीले यसपाली सरप्राइज प्याकेज पनि घोषणा गर्ने बताए । सरकार र तत्कालीन विद्रोही नेकपा माओवादीबीच दशक लामो सशस्त्रद्वन्द्व विधिवत् अन्त्य गर्ने गरी मङ्सिर ५ गते भएको विस्तृत शान्ति सम्झौताको स्मरण गर्दै हरेक वर्ष नेपालगञ्ज म्याराथन आयोजना गर्ने गरिएको छ ।

म्याराथनको अघिल्लो दिन नेपालगञ्ज सम्मेलन (कनक्लेभ) आयोजना गर्ने तयारी भएको ठकुरीले जानकारी दिए । उक्त सम्मेलनमा खेल पर्यटन, युवा उद्यम, महिला सशक्तिकरण, साहित्य र स्वदेशमै रोजगारीलगायत मुद्दामा छलफल हुने उनले बताए ।